Urbisid

Ermənilərin topa tutduğu Hacıqulların malikanəsi

Qarabağın baş tacı sayılan Şuşa yalnız gözəl təbiəti, saf havası, məşhur insanları, musiqisi ilə deyil, həm də çoxsaylı gözəl tikililəri, evləri ilə məşhurdur. Belə evlərdən biri də Şuşanın qədim bəy nəslindən olan Hacıqulların malikanəsidir.

Qeyd edək ki, Şuşanın Çuxur məhəlləsində yerləşən bu üç mərtəbəli saray tipli ev 1849-cu ildə İkinci Gildiya taciri Qulu Məhəmmədəli oğlunun sifarişi əsasında inşa edilib.

Bir zamanlar Cəfərqulu xan Məhəmmədhəsən ağa oğlu Sarıcalı-Cavanşirə xidmət edən Hacı Qulu daha sonra ticarətlə məşğul olub. Sonralar Şuşanın varlı tacirlərindən birinə çevrilib və əqli, fərasəti və zirəkliyi sayəsində xeyli var-dövlət toplayıb.

Hacı Qulu sarayı kimi də tanınan bina öz memarlıq üslubu və milli koloriti ilə Şuşada hər kəsdə heyrət doğururdu. Mülkün 46 otağı və iki böyük qonaq zalı var idi. Evin uzadılmış düzbucaqlı formasına malik planı, ara divarı boyunca inşa edilmiş və birinci mərtəbədəki xidməti otaqları ikinci mərtəbədəki yemək və yaşayış otaqları ilə birləşdirən pilləkəni ilə diqqət çəkir.

Evin tamamilə parad xarakteri daşıyan üçüncü mərtəbəsi iri zal və onun yanlarında yerləşən qonaq otaqlarından ibarət idi.

Əksər Şuşa ev və saraylarından fərqli olaraq Hacıqulların mülkü üçün tikilinin bütün fasadlarında yerləşən çoxlu sayda geniş pəncərələr xarakterikdir. Pəncərələr hamısı şəbəkə ilə işlənmişdi.

1992-ci ildə Şuşa şəhərinin ermənilər tərəfindən işğalı zamanı Hacıqulların mülkü top atəşinə tutularaq divarları dağıdılıb, binaya ciddi ziyan dəyib. Hazırda divarlarının bəzi hissələri qalmaqdadır.

Müzəffər Ordumuzun Ali Baş Komandan İlham Əliyevin rəhbərliyi ilə Vətən müharibəsində qazandığı möhtəşəm qələbədən sonra Qarabağ yeni mərhələyə - dirçəliş mərhələsinə qədəm qoyub. Bərpası nəzərdə tutulan abidə və tikililərin içində Hacıqulların malikanəsinin də olacağı şübhə doğurmur. Qarabağ Dirçəliş Fonduna ianə etməklə siz də bərpa prosesinə öz töhfənizi verə bilərsiniz.

Fonda ianələrin köçürülməsi imkanları haqqında daha ətraflı məlumatı https://qdf.gov.az/iane-et/ linkinə daxil olaraq əldə etmək mümkündür.